នាព្រឹកថ្ងៃទី០៩ ខែមីនា ឆ្នាំ២០១៧ នៅទីស្ដីការក្រសួងសេដ្ឋកិច្ចនិងហិរញ្ញវត្ថុ, ថ្នាក់ដឹកនាំ និងមន្រ្តីរាជការនារី នៃអគ្គលេខាធិការដ្ឋាន បានចូលរួមពិធីសំណេះសំណាលអបអរសាទរខួបអនុស្សាវរីយ៍លើកទី១០៦ ទិវាអន្តរជាតិនារី ០៨ មីនា ឆ្នាំ២០១៧ ក្រោមអធីបតីភាពដ៏ខ្ពង់ខ្ពស់របស់ ឯកឧត្តមបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងមានសមាសភាពចូលរួមពីគ្រប់ថ្នាក់ដឹកនាំ មន្ត្រីរាជការនារី នៃអង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុទាំងអស់។ ទិវាអន្តរជាតិនារី ត្រូវបានមនុស្សទូទាំងពិភពលោកប្រារព្ធធ្វើឡើងនៅថ្ងៃទី០៨ ខែមីនា ជារៀងរាល់ឆ្នាំ ដើម្បីរំលឹកដល់ថ្ងៃដែលនារីទូទាំងពិភពលោក ងើបឡើងតស៊ូទាមទារឱ្យមានការលើកកម្ពស់សិទ្ធិ ស្ថានភាព ជីវភាព ឋានៈ និងតួនាទីរបស់ស្ត្រីនៅក្នុងគ្រួសារ ក៏ដូចជានៅក្នុងកិច្ចការសង្គម និងនយោបាយផងដែរ។ ឆ្នាំ២០១៧ នេះ គឺជាខួបលើកទី ១០៦ នៃទិវាអន្តរជាតិនារី ០៨ មីនា ហើយប្រធានបទសម្រាប់ឆ្នាំនេះគឺ “ស្ត្រីដើម្បីសុខសន្តិភាព និងវឌ្ឍនភាព” ដែលមានគោលបំណងរំលេចពីតម្លៃនៃសន្តិភាព និងលើកកម្ពស់វប្បធម៌អហិង្សា ដែលរាជរដ្ឋាភិបាលបាននិងកំពុងគាំទ្រជំរុញឱ្យមានការចូលរួមពីគ្រប់ស្ថាប័ន រួមទាំងបុរស និងស្ត្រី ដើម្បីវឌ្ឍនភាពសង្គម។