អគ្គលេខាធិការដ្ឋាន ក្រសួ​ង​សេដ្ឋកិច្ច​និងហិរញ្ញវត្ថុ សូមគោរពជម្រាប​ជូន​ដំណឹងដល់​ថ្នាក់​ដឹកនាំ និង​មន្ត្រី​រាជការ នៃ​ក្រសួង​សេដ្ឋកិច្ច​និង​ហិរញ្ញវត្ថុ មេត្តា​ជ្រាប​ថា ដើម្បីឆ្លើយតបនឹងកង្វល់ ក៏ដូចជាស្វែងយល់ពីសេចក្តីត្រូវការចាំបាច់ របស់មន្ត្រីរាជការក្រសួង ដែលពុំមានភាពក្លាហាន ក្នុងការបញ្ចេញមតិយោបល់ជាសាធារណៈ ព្រមទាំងទទួលនូវសំណូមពរ សំណើដំណោះស្រាយ និងពាក្យបណ្តឹងនានា ពាក់ព័ន្ធភាពខ្វះចន្លោះ លើការងារសម្របសម្រួលគាំទ្រទូទៅ​របស់​អគ្គលេខាធិការដ្ឋាន, អគ្គលេខាធិការដ្ឋាន​បានរៀបចំ​ដំឡើង “ប្រអប់សំបុត្រទទួលមតិ” ដែលមានលក្ខណៈដាច់ដោយឡែក ពីប្រអប់សំបុត្រទទួលពាក្យបណ្តឹង របស់ អគ្គនាយកដ្ឋានសវនកម្មផ្ទៃក្នុង និងប្រអប់សំបុត្របម្រើសេវារដ្ឋបាលរបស់ការិយាល័យរដ្ឋបាល នៃនាយកដ្ឋានរដ្ឋបាល និងហិរញ្ញវត្ថុ។ ​ប្រអប់​សំបុត្រនេះ មានវិសាលភាពអនុវត្តសម្រាប់តែការងារពាក់ព័ន្ធសមត្ថកិច្ច​របស់​ អគ្គលេខាធិការដ្ឋាន​ប៉ុណ្ណោះ ហើយបានរៀបចំដាក់ឱ្យដំណើរការ ចំនួន ០២ ទីតាំង នៅក្នុង​ទីស្តីការ​ក្រសួងសេដ្ឋកិច្ច​និង​ហិរញ្ញវត្ថុ រួមមាន៖
១.ទីតាំងទី១ ៖ស្ថិតនៅខាងមុខការិយាល័យរដ្ឋបាលនៃនាយកដ្ឋានរដ្ឋបាលនិងហិរញ្ញវត្ថុ(ក្បែរអគារ “ឃ”)
២.ទីតាំងទី២ ៖ស្ថិតនៅកៀនអគារ “ខ” (ក្បែរចំណតម៉ូតូ)។
អគ្គលេខាធិការដ្ឋានសង្ឃឹមយ៉ាងមុតមាំថា ក្រោយពីដាក់ឱ្យដំណើរការនូវ “ប្រអប់សំបុត្រទទួលមតិ” ទាំងពីរនេះ មន្ត្រីរាជការគ្រប់រូប នឹងចូលរួមចំណែកជាវិភាគទានគំនិត និងសំណើកែលម្អ ប្រកបដោយស្មារតីទទួលខុសត្រូវ និងវិជ្ជាជីវៈ ដើម្បីជាប្រយោជន៍ ​ក្នុង​ការ​ស្ថាបនា​ការ​ងារ​អគ្គលេខាធិការដ្ឋាន ក្នុងនាមជាសេនាធិការរបស់ក្រសួងសេដ្ឋកិច្ចនិងហិរញ្ញវត្ថុទាំងមូល។ ទន្ទឹមនេះ អគ្គលេខាធិការដ្ឋាននឹងព្យាយាមប្រមូលនូវសំណើទាំងឡាយ យកមកសិក្សា និងរិះរកដំណោះស្រាយទៅតាមសមត្ថភាព និងសមត្ថកិច្ចដែលយើងមាន ដើម្បីឆ្លើយតបទៅនឹងកង្វល់ របស់មន្ត្រីយើងគ្រប់រូប។