នាយកដ្ឋានបច្ចេកវិទ្យាព័ត៌មាន បំពេញមុខងារជាសេនាធិការឱ្យអគ្គលេខាធិការដ្ឋាន លើការងារព័ត៌មានវិទ្យា ដោយមានភារកិច្ចដូចតទៅ៖
- គ្រប់គ្រងនិងអនុវត្តគម្រោង “ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ” នៅគ្រប់ដំណាក់កាល ដើម្បីធានាសម្រេចឱ្យបាននូវគោលដៅនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ របស់ក្រសួងសេដ្ឋកិច្ចនិងហិរញ្ញវត្ថុ និងរាជរដ្ឋាភិបាលកម្ពុជា
- គ្រប់គ្រងនិងថែរក្សាហេដ្ឋារចនាសម្ព័ន្ធបច្ចេកវិទ្យាព័ត៌មាន និងគមនាគមន៍នៅក្នុងក្រសួងសេដ្ឋកិច្ចនិងហិរញ្ញវត្ថុ
- សហការ សម្របសម្រួល និងផ្ដល់យោបល់ផ្នែកបច្ចេកទេសជូនអគ្គនាយកដ្ឋាន នាយកដ្ឋាន និងអង្គភាពនានានៃក្រសួងសេដ្ឋកិច្ចនិងហិរញ្ញវត្ថុ លើការងារពាក់ព័ន្ធនឹងបច្ចេកវិទ្យាព័ត៌មាននិងគមនាគមន៍
- រៀបចំ បង្កើត និងពង្រឹងយុទ្ធសាស្ត្រនិងគោលនយោបាយបច្ចេកវិទ្យាព័ត៌មាននិងគមនាគមន៍ ដើម្បីទ្រទ្រង់ដល់ការគ្រប់គ្រងហិរញ្ញវត្ថុសាធារណៈឱ្យកាន់តែមានប្រសិទ្ធភាពនិងតម្លាភាព
- ផ្ដល់សេវាបច្ចេកវិទ្យាព័ត៌មាននិងគមនាគមន៍នានា រួមមាន ការតភ្ជាប់បណ្ដាញកុំព្យូទ័រ បណ្ដាញអ៊ីនធើណេត អ៊ីម៉ែល និងការចែករំលែកឯកសារតាមបណ្តាញកុំព្យូទ័រសម្រាប់ ក្រសួងសេដ្ឋកិច្ចនិងហិរញ្ញវត្ថុ
- គ្រប់គ្រងនិងអភិវឌ្ឍគេហទំព័រ និងបណ្ដាញសារអេឡិចត្រូនិករបស់ក្រសួងសេដ្ឋកិច្ចនិងហិរញ្ញវត្ថុ
- ស្រាវជ្រាវបង្កើតនិងអភិវឌ្ឍកម្មវិធីកុំព្យូទ័រថ្មីៗ ដើម្បីបម្រើនិងសម្រួលដល់កិច្ចដំណើរការការងារនិងការប្រព្រឹត្ត-ទៅរបស់ក្រសួងសេដ្ឋកិច្ចនិងហិរញ្ញវត្ថុ
- កសាងសមត្ថភាព និងផ្សព្វផ្សាយបច្ចេកវិទ្យាព័ត៌មាន និងគមនាគមន៍ និងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ ជូនមន្ត្រី នៃក្រសួងសេដ្ឋកិច្ចនិងហិរញ្ញវត្ថុ
- ទទួលបន្ទុកជាមជ្ឈមណ្ឌលព័ត៌មានលើការអនុវត្តបច្ចេកវិទ្យាព័ត៌មាននិងគមនាគមន៍នៅគ្រប់អគ្គនាយកដ្ឋាន នាយកដ្ឋាន និងអង្គភាពទាំងអស់ នៃក្រសួងសេដ្ឋកិច្ចនិងហិរញ្ញវត្ថុ
- ធ្វើសហប្រតិបត្តិការក្នុងក្របខ័ណ្ឌជាតិ តំបន់ និងអន្តរជាតិលើការងារពាក់ព័ន្ធនឹងការអភិវឌ្ឍវិស័យបច្ចេកវិទ្យាព័ត៌មាននិងគមនាគមន៍ សម្រាប់ក្រសួងសេដ្ឋកិច្ចនិងហិរញ្ញវត្ថុ
- បំពេញភារកិច្ចផ្សេងទៀត តាមការកំណត់របស់អគ្គលេខាធិការដ្ឋាន។
១. ការិយាល័យហេដ្ឋារចនាសម្ព័ន្ធបច្ចេកវិទ្យាព័ត៌មាននិងគមនាគមន៍ មានភារកិច្ចដូចតទៅ៖
- គ្រប់គ្រង ជួសជុល និងថែរក្សា បណ្ដាញតភ្ជាប់និងឧបករណ៍បច្ចេកវិទ្យាព័ត៌មាននិងគមនាគមន៍ របស់ក្រសួងសេដ្ឋកិច្ចនិងហិរញ្ញវត្ថុ
- គ្រប់គ្រងមជ្ឈមណ្ឌលទិន្នន័យ និងមជ្ឈមណ្ឌលសង្គ្រោះទិន្នន័យរបស់ក្រសួងសេដ្ឋកិច្ចនិងហិរញ្ញវត្ថុ ដែលជាសមិទ្ធផលបានមកពីគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ និងគម្រោងពាក់ព័ន្ធដទៃទៀត
- គ្រប់គ្រងការប្រើប្រាស់បណ្ដាញអ៊ីនធើណេត នៅក្នុងក្រសួងសេដ្ឋកិច្ចនិងហិរញ្ញវត្ថុ
- ផ្ដល់សេវាបច្ចេកវិទ្យាព័ត៌មាននិងគមនាគមន៍នានា រួមមាន ការតភ្ជាប់បណ្ដាញកុំព្យូទ័រ បណ្ដាញអ៊ីនធើណេត និងការចែករំលែកឯកសារនៅក្នុងក្រសួងសេដ្ឋកិច្ចនិងហិរញ្ញវត្ថុ
- ទ្រទ្រង់ការតភ្ជាប់បណ្ដាញបច្ចេកវិទ្យាព័ត៌មាននិងគមនាគមន៍ ទៅនឹងបណ្ដាញខាងក្រៅក្រសួងសេដ្ឋកិច្ចនិងហិរញ្ញវត្ថុ
- ធ្វើបច្ចុប្បន្នភាពស្ថិតិពាក់ព័ន្ធនឹងការប្រើប្រាស់បច្ចេកវិទ្យាព័ត៌មាននិងគមនាគមន៍ ក្នុងក្របខណ្ឌក្រសួងសេដ្ឋកិច្ចនិងហិរញ្ញវត្ថុ។
២. ការិយាល័យគ្រប់គ្រងកម្មវិធីនិងមុខងារព័ត៌មានវិទ្យា មានភារកិច្ចដូចតទៅ៖
- គ្រប់គ្រងទិន្នន័យមូលដ្ឋាន និងប្រព័ន្ធសមាហរណកម្មព័ត៌មានរបស់ក្រសួងសេដ្ឋកិច្ចនិងហិរញ្ញវត្ថុ ដែលជាសមិទ្ធផលបានមកពីគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ និងគម្រោងពាក់ព័ន្ធដទៃទៀត
- ចូលរួមប្រមូល រៀបចំ និងចងក្រងឯកសារតម្រូវការបច្ចេកទេស ដើម្បីបញ្ចូលទៅក្នុងឯកសារដេញថ្លៃប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ នៅពេលដែលវិសាលភាពនៃការអនុវត្តប្រព័ន្ធនេះនឹងត្រូវបានពង្រីក
- រៀបចំ សម្របសម្រួល និងដឹកនាំការពិនិត្យឡើងវិញ និងការចងក្រងនីតិវិធីអនុវត្តការងារបច្ចុប្បន្នពាក់ព័ន្ធនឹងគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ របស់អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ និងក្រសួង-ស្ថាប័ននៅថ្នាក់ជាតិនិងថ្នាក់ក្រោមជាតិ ដើម្បីជាធាតុចូលក្នុងការកសាងនីតិវិធីអនុវត្តការងារថ្មី និងបំពេញចន្លោះខ្វះខាតលើនីតិវិធីអនុវត្តការងាររបស់ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ ដែលរៀបចំដោយក្រុមហ៊ុនផ្គត់ផ្គង់ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ
- ចូលរួមសហការ ជាមួយការិយាល័យគោលនយោបាយ និងសុវត្ថិភាពបច្ចេកវិទ្យាព័ត៌មាន និងគមនាគមន៍ និងនវានុវត្តន៍ ក្នុងការអនុវត្តនវានុវត្តន៍បច្ចេកវិទ្យាព័ត៌មាននិងគមនាគមន៍។
៣. ការិយាល័យគោលនយោបាយនិងសុវត្ថិភាពបច្ចេកវិទ្យាព័ត៌មាននិងគមនាគមន៍និងនវានុវត្តន៍ មានភារកិច្ចដូចតទៅ៖
- កសាងឯកសារគោលនយោបាយ និងឯកសារយុទ្ធសាស្ត្រសម្រាប់ក្រសួងសេដ្ឋកិច្ចនិងហិរញ្ញវត្ថុ លើវិស័យបច្ចេកវិទ្យាព័ត៌មាន និងគមនាគមន៍ ដើម្បីធានានូវការអនុវត្ត និងការប្រើប្រាស់បច្ចេកវិទ្យាព័ត៌មាននិងគមនាគមន៍ ប្រកបដោយគណនេយ្យភាព ប្រសិទ្ធភាព ស័ក្ដិសិទ្ធិភាព និងសុវត្ថិភាព
- សហការជាមួយការិយាល័យកសាងសមត្ថភាពនិងផ្សព្វផ្សាយ ដើម្បីកសាងផែនការ និងយុទ្ធសាស្ត្រអភិវឌ្ឍសមត្ថភាពមន្ត្រីរាជការ និងអ្នកពាក់ព័ន្ធ ក្នុងគោលដៅបម្រើដល់ការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និងគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ
- ពង្រឹងផ្នែកសុវត្ថិភាព លើការប្រើប្រាស់បច្ចេកវិទ្យាព័ត៌មាន និងគមនាគមន៍ សម្រាប់ក្រសួងសេដ្ឋកិច្ចនិង ហិរញ្ញវត្ថុ ដូចជា ការបង្កើតប្រព័ន្ធសុវត្ថិភាពនិងការថែរក្សាឯកសារប្រកបដោយសុវត្ថិភាព សម្រាប់អ្នកប្រើប្រាស់ម៉ាស៊ីនកុំព្យូទ័រ នៅក្នុងក្រសួងសេដ្ឋកិច្ចនិងហិរញ្ញវត្ថុ
- ផ្ដួចផ្ដើមក្នុងការស្រាវជ្រាវ និងអភិវឌ្ឍកម្មវិធីកុំព្យូទ័រថ្មីៗ ដើម្បីបម្រើនិងសម្រួលដល់កិច្ចដំណើរការការងារ និងការប្រព្រឹត្តទៅរបស់ក្រសួងសេដ្ឋកិច្ចនិងហិរញ្ញវត្ថុ។
៤. ការិយាល័យកសាងសមត្ថភាពនិងផ្សព្វផ្សាយ មានភារកិច្ចដូចតទៅ៖
- គ្រប់គ្រង រៀបចំការបណ្តុះបណ្តាល និងផ្សព្វផ្សាយអំពីការប្រើប្រាស់ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ និងបច្ចេកវិទ្យាព័ត៌មាននិងគមនាគមន៍ជូនមន្ត្រី នៃក្រសួងសេដ្ឋកិច្ចនិងហិរញ្ញវត្ថុ នៅតាមបណ្តារាជធានី ខេត្ត និងមន្ត្រីពាក់ព័ន្ធនៅតាមបណ្តាក្រសួង ស្ថាប័នផ្សេងទៀត តាមរយៈការរៀបចំកិច្ចប្រជុំ សិក្ខាសាលា ខិតប័ណ្ណព័ត៌មាន និងមធ្យោបាយផ្សព្វផ្សាយនានា
- ប្រមូលនិងចងក្រងឯកសារនានាពាក់ព័ន្ធការបណ្តុះបណ្តាល និងកសាងសមត្ថភាពផ្នែកបច្ចេកវិទ្យាព័ត៌មាន និងគមនាគមន៍ និងរៀបចំជាបណ្ណាសារអេឡិចត្រូនិក ដើម្បីផ្សព្វផ្សាយចំណេះដឹង និងចំណេះធ្វើដល់មន្ត្រី នៃក្រសួងសេដ្ឋកិច្ចនិងហិរញ្ញវត្ថុ និងសាធារណជន
- រៀបចំ បង្កើត និងវាយតម្លៃលើការអនុវត្តយុទ្ធសាស្ត្រនិងគោលនយោបាយគ្រប់គ្រងការផ្លាស់ប្ដូរ និង គ្រប់គ្រងហានិភ័យដើម្បីទ្រទ្រង់ដល់ការអនុវត្តប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ ឱ្យកាន់តែមានតម្លាភាព និងប្រសិទ្ធភាព
- សហការជាមួយក្រុមហ៊ុនផ្គត់ផ្គង់ប្រព័ន្ធព័ត៌មានវិទ្យាគ្រប់គ្រងវិស័យហិរញ្ញវត្ថុសាធារណៈ ក្នុងការរៀបចំវគ្គបណ្តុះបណ្តាលនានាដែលផ្ដល់ដោយក្រុមហ៊ុននេះ និងការអនុវត្តយុទ្ធសាស្ត្រគ្រប់គ្រងការផ្លាស់ប្តូរ ទប់ទល់នឹងហានិភ័យ និងផលប៉ះពាល់ពីអន្តរកម្មនៃការអនុវត្តប្រព័ន្ធចាស់ និងប្រព័ន្ធថ្មី
- គ្រប់គ្រងនិងអភិវឌ្ឍ គេហទំព័រនិងបណ្ដាញសារអេឡិចត្រូនិករបស់ក្រសួងសេដ្ឋកិច្ចនិងហិរញ្ញវត្ថុ
- សហការជាមួយនឹងវិទ្យាស្ថានសេដ្ឋកិច្ចនិងហិរញ្ញវត្ថុ និងស្ថាប័នដៃគូនានាក្នុងការស្វះស្វែងរកអាហារូបករណ៍នានាដើម្បីពង្រឹងសមត្ថភាពផ្នែកបច្ចេកវិទ្យាព័ត៌មាននិងគមនាគមន៍ ទាំងក្នុងស្រុកនិងក្រៅប្រទេសជូនដល់មន្ត្រីរាជការរបស់ក្រសួងសេដ្ឋកិច្ចនិងហិរញ្ញវត្ថុ។
៥. ការិយាល័យរដ្ឋបាលនិងសហប្រតិបត្តិការ មានភារកិច្ចដូចតទៅ៖
- គ្រប់គ្រងកិច្ចការរដ្ឋបាលទូទៅប្រចាំនាយកដ្ឋានព័ត៌មានវិទ្យា និងប្រព័ន្ធគ្រប់គ្រងឯកសារអេឡិចត្រូនិក
- សហការជាមួយអគ្គនាយកដ្ឋាននិងអង្គភាពពាក់ព័ន្ធក្រោមឱវាទក្រសួងសេដ្ឋកិច្ចនិងហិរញ្ញវត្ថុ ក្នុងការរៀបចំនិងអនុវត្តមាតិកាគណនេយ្យ គណនីទោលរតនាគារជាតិ ការរៀបចំផែនការថវិកា មាតិកាថវិកា អង្គភាពថវិកា ការអនុវត្តថវិកា និងការរៀបចំក្របខ័ណ្ឌចំណាយរយៈពេលមធ្យម ដើម្បីជាធាតុចូលសម្រាប់ការអនុវត្តប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ
- ចូលរួមសហការជាមួយអង្គភាពពាក់ព័ន្ធ ដើម្បីពិនិត្យនិងផ្តល់យោបល់ លើការរៀបចំសេចក្តីព្រាងច្បាប់និងលិខិតបទដ្ឋានគតិយុត្តពាក់ព័ន្ធនឹងគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ
- ស្វែងរកនិងផ្តល់ជាធាតុចូលនូវព័ត៌មាននានា សម្រាប់គេហទំព័ររបស់ក្រសួង និងគម្រោងប្រព័ន្ធព័ត៌មានវិទ្យាគ្រប់គ្រងវិស័យហិរញ្ញវត្ថុសាធារណៈ
- សម្របសម្រួលលើកិច្ចសហប្រតិបត្តិការក្នុងក្របខ័ណ្ឌជាតិ តំបន់ និងអន្តរជាតិ លើការអភិវឌ្ឍវិស័យបច្ចេកវិទ្យាព័ត៌មាននិងគមនាគមន៍
- សម្របសម្រួលកិច្ចសហប្រតិបត្តិការជាមួយបណ្តាអង្គភាព ឬស្ថាប័នជាតិនិងអន្តរជាតិ ក្នុងការទប់ស្កាត់រាល់បាតុភាពអវិជ្ជមានទាំងឡាយ នៅក្នុងវិស័យបច្ចេកវិទ្យាព័ត៌មាននិងគមនាគមន៍។
